Übung macht den Meister
Jessas, jessas … a jeder von eich kennt bestimmt des G’fui, wemma am ersten Arbeitsdog in da neia Firma drinsteht, oder? Ma mecht möglichst glei sofort ois 100% richtig macha und stäid si trotzdem gefühlt o wia da letzte Depp ... 😳 Und genauso is mia ganga, obwoi’s mei eigene Firma is! 😅
Nach da Neueröffnung meiner eigenen Produktion letzt’n Samsdog hods ned lang dauert, und de ersten Bestellungen san ei’trudelt. Und neba da Freid darüber bin i a wahnsinnig nervös g’wesn, damit beim ersten moi fei ja nix schiaf geht – wos dann freilich glei so g'wesn is ... 😱
Oiiiso noamoi ois nei und in Ruuuhe – ned hudln, oans nach’m andern! Und schau her, am zwoatn Dog is scho glei fui bessa glaffa 😅
An wos do ois denga muast – Bestellung ausdrucka, Shirts raussuacha, Textil vorbehandeln, vorpressen, drucka (as richtige Motiv in da richtign Gräß auf’s richtige Shirt mit de richtign Einstellungen), nachpressn, Nackenlabel ei’pressn, mit Liebe ei’packln, Versandetikettn drucka und 'naufpappn auf’s richtige Packl, Versanddienstleister elektronisch mit der Abholung beauftragen und …. uuuuuuufffffffffff, aufatmen wenn des dann tatsächlich klappt und der Packlpostler dann tatsächlich auftaucht und ois mitnimmt! 🙌
Meine ganzen Maschinen woin dann freilich vorher und hinterher a no mei Aufmerksamkeit und dass ma si fei ja brav um se kümmert, ois schee butzn damit am kommenden Dog ois wieder so funktioniert wias soi! Zammramma, durchatmen, Feieromd! 🍺✌️
I dad song: Stapellauf erfolgreich absolviert! 💪😎 Jetz bin i g’spannt ob de ersten Kunden a z’friedn san mit ihrer Lieferung – und dann muas i „bloß“ no a weng Routine in die ganze Sach neibringa, dann kannt ma des ois doch glatt richtig Spaß macha!